اسلام آباد: وفاقی حکومت نے غیرملکی شہریت ظاہر نہ کرنے والے سرکاری افسران کو ایک ہفتے کی مہلت دے دی ہے۔ جمعے کو جاری ہدایت میں خبردار کیا گیا ہے کہ اپنی یا اہل خانہ کی غیرملکی شہریت کا اعلامیہ جمع نہ کرانے والے افسران کے خلاف مہلت ختم ہونے پر تادیبی کارروائی کی جائے گی۔
اسٹیبلشمنٹ ڈویژن کی جانب سے تمام وزارتوں، ڈویژنوں، صوبائی چیف سیکرٹریز اور پولیس سربراہان کو بھجوائے گئے دفتری یادداشت میں سول سرونٹس (غیرملکی و دوہری شہریت کے افشا اور ممانعت) رولز 2026 کے نفاذ کو سخت کیا گیا ہے۔ یہ قواعد یکم جون کو سرکاری گزٹ میں شائع ہوئے تھے۔
قواعد کیا کہتے ہیں
رولز کی شق 3(3) کے تحت ہر سرکاری افسر پر لازم تھا کہ وہ قواعد کی اشاعت کے 90 دن کے اندر اپنی اور اپنے زیر کفالت افراد کی غیرملکی یا دوہری شہریت ظاہر کرے۔ یہ مہلت یکم ستمبر کو ختم ہو چکی تھی۔ اسٹیبلشمنٹ ڈویژن 17 جولائی کو بھی محکموں کو یاد دہانی کرا چکا تھا کہ تمام افسران مقررہ فارم پر 90 دن کے اندر اعلامیے جمع کرائیں۔
اعلامیے میں شہریت کی حیثیت، غیرملکی سفری دستاویزات کا رکھنا اور غیرملکی شہری سے شادی کا انکشاف شامل ہے۔ شق 3(4) کے تحت مطلوبہ اعلامیہ جمع نہ کرانا یا غلط اعلامیہ جمع کرانا سول سرونٹس (ایفیشنسی اینڈ ڈسپلن) رولز 2020 کے تحت بدانتظامی کے زمرے میں آتا ہے۔
کون سے افسران تاحال نادہندہ ہیں
تازہ حکم نامے میں نشاندہی کی گئی ہے کہ پاکستان ایڈمنسٹریٹو سروس (سابقہ ڈسٹرکٹ مینجمنٹ گروپ)، پولیس سروس آف پاکستان، سیکرٹریٹ گروپ اور آفس مینجمنٹ گروپ کے متعدد افسران نے تاحال اعلامیے جمع نہیں کرائے۔ مجاز اتھارٹی نے ہدایت کی ہے کہ ان چاروں سروسز کے جو افسران ایک ہفتے میں اعلامیے جمع نہ کرائیں ان کے خلاف تادیبی کارروائی کی جائے گی۔
غلط بیانی پر تقرری کالعدم
2026 کے قواعد کے تحت ہر سرکاری افسر کے لیے تقرری کے وقت کیڈر ایڈمنسٹریٹر کو یہ بتانا بھی لازم ہے کہ وہ یا اس کا کوئی زیر کفالت فرد غیرملکی شہری ہے یا غیرملکی سفری دستاویز رکھتا ہے۔ قواعد میں واضح کیا گیا ہے کہ اس سلسلے میں اعلامیہ جمع نہ کرانے یا غلط اعلامیہ دینے کی صورت میں تقرری شروع ہی سے کالعدم تصور ہو گی اور اسے کسی بھی وقت ختم کیا جا سکے گا۔ افسران کو اپنے کیڈر ایڈمنسٹریٹر کے پاس سالانہ اعلامیے بھی جمع کرانا ہوں گے۔
یکم ستمبر کی مہلت پہلے ہی گزر چکی ہے، اس لیے اب خاموش رہنے والے افسران کو ایک اور یاد دہانی کے بجائے باقاعدہ تادیبی کارروائی کا سامنا کرنا پڑے گا۔ یہ اقدام رواں سال کی وسیع تر شفافیت مہم کا حصہ ہے جس کے تحت گریڈ 17 اور اس سے اوپر کے افسران کو ایف بی آر کے آن لائن پورٹل پر اثاثوں کے گوشوارے جمع کرانے کی ہدایت بھی کی گئی تھی۔
ویب ڈیسک
