بلومفونٹین: جنوبی افریقہ کے نوجوان بلے باز لھوان ڈرے پریٹوریئس نے ٹی ٹوئنٹی کرکٹ میں نئی تاریخ رقم کر دی ہے۔ انہوں نے سی ایس اے ٹی ٹوئنٹی چیلنج میں مانگاؤنگ اوول میں نائٹس کے خلاف ٹائٹنز کی جانب سے 79 گیندوں پر ناقابل شکست 188 رنز بنا کر کرس گیل کا 13 سال سے زائد عرصے سے قائم عالمی ریکارڈ توڑ دیا۔ 20 سالہ بلے باز ٹی ٹوئنٹی اننگز میں پہلی ڈبل سنچری سے صرف 12 رنز کی دوری پر رہے۔
پریٹوریئس نے گیل کے 175 ناٹ آؤٹ کا ریکارڈ توڑا جو انہوں نے 2013 کے انڈین پریمیئر لیگ میں رائل چیلنجرز بنگلور کی جانب سے پونے واریئرز کے خلاف 66 گیندوں پر بنایا تھا۔
تباہ کن بیٹنگ
بائیں ہاتھ کے اوپنر نے 24 گیندوں پر نصف سنچری مکمل کی، صرف 16 مزید گیندوں پر سنچری بنائی اور 58 گیندوں پر 150 رنز تک پہنچ گئے۔ یہ ان کی تیسری ٹی ٹوئنٹی سنچری تھی۔ ان کی اننگز میں 15 چوکے اور 13 چھکے شامل تھے جبکہ نائٹس کے ہر بولر کی اکانومی 11 سے اوپر رہی۔ 79 گیندوں کی یہ اننگز گیندوں کے لحاظ سے ٹی ٹوئنٹی کی طویل ترین اننگز کے ریکارڈ کے برابر بھی ہے جو وہ اب ایرون فنچ اور مارکس اسٹوئنس کے ساتھ شیئر کرتے ہیں۔
ٹائٹنز کی 124 رنز سے جیت
پریٹوریئس کی بدولت ٹائٹنز نے 3 وکٹوں پر 267 رنز بنائے جو سی ایس اے ٹی ٹوئنٹی چیلنج کی تاریخ کا دوسرا بڑا مجموعہ ہے۔ ٹورنامنٹ کا ریکارڈ 271 رنز بھی ٹائٹنز نے ہی 2022 میں نائٹس کے خلاف بنایا تھا، اور اسی میچ میں ڈیوالڈ بریوس کے 162 رنز ٹورنامنٹ کی اس وقت کی بہترین انفرادی اننگز تھی۔ ٹائٹنز کے پاس اب مقابلے کے پانچ بڑے مجموعے ہیں۔ 268 رنز کے ہدف میں نائٹس کی ٹیم 143 رنز پر ڈھیر ہو گئی۔ گیہان کلوٹے نے 25 گیندوں پر 39 رنز بنائے جبکہ ٹائٹنز کے کپتان ڈونوین فریرا نے 16 رنز دے کر 3 وکٹیں حاصل کیں۔
ابھرتا ہوا ستارہ
یہ اننگز 2026-27 کے ڈومیسٹک سیزن میں پریٹوریئس کی پہلی پیشی تھی اور ان کی شاندار فارم کا تسلسل ہے۔ اس سے قبل ستمبر میں سہ ملکی سیریز میں انہوں نے زمبابوے اور نمیبیا کے خلاف جنوبی افریقہ کی جانب سے 94 اور 101 رنز بنائے تھے۔ صرف 22 بین الاقوامی میچز کھیلنے کے باوجود وہ 91 ٹی ٹوئنٹی میچز میں 150.44 کے اسٹرائیک ریٹ سے رنز بنا چکے ہیں۔
ویب ڈیسک
